कालिकोट । कालिकोटमा पहिरोले घर पुर्दा मृत्यु भएका एकै परिवारका ६ जनाको सनाखत भएको छ ।
महावै गाउँपालिका–३, नकुमा गएराति वडा सदस्य राजबहादुर बिष्टको घर पहिरोले पुरेको थियो ।
पहिरोमा परेर राजबहादुरका छोरा १३ वर्षीय पुष्प विष्ट, ११ वर्षीय प्रविण विष्ट, छोरी १८ वर्षीया सविना विष्ट र १५ वर्षीया आशा विष्टको मृत्यु भएको कर्णाली प्रदेश प्रहरी कार्यालयले जानकारी दिएको छ ।
त्यस्तै राजबहादुरका दाजु डिलबहादुरका १९ वर्षीया छोरी शान्ति विष्ट र १० वर्षीया छोरी रेखा विष्टको पनि सोही पहिरोमा परी मृत्यु भएको छ ।
प्रहरीका अनुुसार, उनीहरु रातिसम्म तीजको लागि नाचगान गरिरहेका थिए ।
माथिबाट एक्कासी पहिरो आएपछि उनीहरु पुरीएका थिए । शुक्रबार बिहान उनीहरुको शव निकालिएको हो ।
