काठमाडौं ।अधिकारकार्मी गौरी बडालले भारतमा गएर कैयौँ महिला तथा बालबालिका उतै मजदुरी गर्ने, बिहेबारी गर्ने र शोषणमा पर्ने गरेको बताएकी छिन् ।
यसका अलवा उनले खुला सीमानाका भएका कारण पनि कहाँ गए भन्ने यकिन पनि नभएको बताइन् । ‘कोही सम्पर्कमा आए पनि प्रहरीलाई घर फर्किएको जानकारी गराउँदैनन्,’ उनले भनिन् ।
चार वर्षयता दार्चुलामा २०४ जना महिला तथा बालबालिका हराएको बताइएको छ । हराएकामध्ये १५० जना महिला तथा बालबालिका घर फर्किए भने ५२ जना अझै पत्ता नलागेको जिल्ला प्रहरी कार्यालय दार्चुला महिला तथा बालबालिका सेलले जनाइएको छ ।
हराएको भनी उजुरी परेकामध्ये केही महिला तथा बालबालिका भने घर फर्किसकेका बताइएको छ ।
अभिभावकले दिएको हुलियाका आधारमा प्रहरीले खोजी गर्दा र आफैँ घर फर्केकासमेत प्रहरीले जानकारी दिएको छ । हराएका अधिकांश महिला वैवाहिक सम्बन्ध स्थापित गर्न आफूखुशी हिँड्ने गरेको प्रहरीको अनुमान छ । परिवारलाई अत्तोपत्तो नदिइ घर, विद्यालय, पसल, घाँस दाउराबाटै हराउँदा परिवारलाई मानसिक तथा शारीरिक तनाव हुने गरेको प्रहरीले जनाएको छ ।
गरिबी, चेतना अभाव, मादक पदार्थ सेवन, पारिवारिक बेमेललगायतका कारण महिला तथा बालबालिका घर छाड्न बाध्य हुने गरेको जिल्ला प्रहरी कार्यालय दार्चुलाले जनाएको छ ।
दार्चुलामा भारतसँगको खुला सीमाका कारण पनि भारतमा गएर उतै बेपत्ता हुने अवस्था पनि विद्यमान छ ।
दार्चुलामा भारतसँग लेकमको लाली, मालिकार्जुनको जोलजीवी, महाकाली नगरपालिकाको दत्तु सदरमुकाम खलङ्गा र व्यास गाउँपालिकाको तिगरम र सीतापुलमा वैधानिक नाका छन् भने ट्युब र तुइनमार्फत वारपार गरेर जाने गरेका छन् ।
