स्याङजा । अविरल वर्षासँगै आएको पहिरोमा पुरिएर स्याङजामा तीन जना बेपत्ता भएका छन् ।
कालीगण्डकी गाउँपालिका–४ खहरेमा पानी बनाउन भनी गएका स्थानीय पहिरोमा परेका हुन् ।
मंगलबार बिहान पानी बनाउन भनेर गएका ६ जनामध्ये तीन जनाको घटनास्थलबाट उद्धार गरिएको जिल्ला प्रहरी कार्यालय स्याङजाले जनाएको छ ।
खहरेका हुमनाथ पाण्डे, ईमान सिंह राना र वीरबहादुर रानालाई घाइते अवस्थामा उद्धार गरी गल्याङमा उपचारका लागि पठाइएको छ।
प्रहरीका अनुसार, तीन जना अझै बेपत्ता छन् । उनीहरु जाँदै गर्दा माथिबाट पहिरो खसेको स्थानीयले बताएका छन् ।
पहिरोमा प्रेमचन्द्र पाण्डे, जिमानसिंह थापा र टिकाबहादुर थापा हराइरहेका छन् ।
घटनास्थलमा जिल्ला प्रहरी कार्यालय स्याङजाबाट प्रहरी उपरीक्षकको कमाण्डमा र वडा प्रहरी कार्यालय वालिङ स्याङजाबाट समेत थप प्रहरी टोली खटिएको छ।
यस्तै बेलटारीबाट नेपाली सेनाको टोली र वालिङबाट सशस्त्र प्रहरीको टोली समेत उद्धारमा खटिएको छ ।