केही दिनयता ससुराद्वारा बुहारीमाथि कुटपिट भएकाे एउटा भिडियो सामाजिक सञ्जालमा भाइरल छ । महिलालाई पुरुषले कम्मरमा बाँध्ने पेटीले कुटेको र पछाडिबाट अर्का पुरुषले थप कुट्न निर्देशन दिएको भिडियोले अहिले सामाजिक सञ्जालमा चर्चा पाएको हाे ।
भिडियोमा नेपाली भाषा प्रयोग भएको छ, कुटाइ खाने महिलाले रुँदै गुहार मागेकी छिन् तर उनलाई कसैले पनि सहयोग गर्दैन । त्याे भिडियो अछामको भएको भन्दै छानबिन हुनुपर्ने माग उठेपछि प्रहरीले अनुसन्धान गर्दा कुट्ने र कुटाइ खाने व्यक्ति अछामकै भएको जनाएकाे छ । तर, उनीहरू अहिले भारतको महाराष्ट्रमा रहेको प्रहरीले जनाएको छ ।
सामाजिक संजालमा महिला उपर ससुराद्वारा भएको कुटपिटको भिडियो क्लिप प्राप्त हुनासाथ जि.प्र.का. अछाम मार्फत छानबिन अगाडि बढाइएकोमा सो घटनामा संलग्न परिवारका सदस्यहरु हाल भारतमा बसोबास गरिरहेको र उक्त घट्ना अछाममा नभई भारतको महाराष्ट्रमा घटेको खुल्न आएको व्यहोरा जानकारी गराउँदछौं ।
— Nepal Police (@NepalPoliceHQ) July 7, 2020