काठमाडौं उपत्यकाभित्र कोरोना संक्रमितको संकट थपिँदै जाँदा गृह मन्त्रालयले सुरक्षा व्यवस्था कडा बनाउन निर्देशन दिएको छ ।
सडकमा गुड्ने सवारीदेखि मानिसले सङ्क्रमणबाट जोखिन सामाजिक दूरीदेखि मास्कसमेत लगाएको नलगाएको हेर्न गृहले प्रहरीलाई निर्देशन दिइसकेको छ । गृह मन्त्रालयले सोमवार नै प्रहरी प्रधान कार्यालय नक्साललाई पत्राचार गर्दै ७७ वटै जिल्लामा मास्क नलगाई घरबाहिर निस्कनेलाई नियन्त्रणमा लिई कारबाही गर्न निर्देशन दिएको हो ।
त्यस्तै, काठमाडौं उपत्यकाभित्र सरकारले परिवर्तन गरेको मोडालिटी विपरीत सवारीसाधन चलेकाले थप कडा गर्न निर्देशन दिएको हो । सरकारले निजी सवारीसाधनलाई जोर बिजोरको आधारमा सञ्चालन गर्न दिइरहेको छ । तर, अहिले धेरैले जोरबिजोर प्रणालीको बेवास्ता गरेर सवारी चलाएको पाइएपछि थप कडाइ गर्न लागेको हो ।
महानगरीय ट्राफिक प्रहरी महाशाखाले जोर बिजोर प्रणालीको पूर्ण पालना गराउन ५६ वटा चेकप्वाइन्ट राखी थप कडाइ गरिरहेको छ ।' जोरबिजोर प्रणाली उल्लङ्घन गरेर सवारी चलाउनेको सङ्ख्या बढेकाले थप कडाइ गर्नु परेको हो ।' महाशाखाका एसएसपी भीमप्रसाद ढकालले भने ।
सोमबार मात्र जोर बिजोर प्रणालीको उल्लङ्घन गरी सञ्चालन गरेका १ हजार ६११ वटा दुई पाङ्ग्रे, ४१५ भाडाकार (ट्याक्सी) र ३१९ वटा साना तथा ठुला सवारी गरी जम्मा २ हजार ३ सय ४५ वटा सवारी साधनलाई उपत्यकाको विभिन्न स्थानबाट ट्राफिक प्रहरीले नियन्त्रणमा लिएको एसएसपी ढकालले जानकारी दिए ।
काठमाडौं उपत्यकामा जेठ ३० गतेदेखि आजसम्म जोर बिजोर प्रणाली उल्लङ्घन गर्ने ४१ हजार ५०८ वटा सवारी साधनहरू नियन्त्रणमा लिई सकेको महाशाखाले जनाएको छ ।
सरकारले असार १ गतेबाट लकडाउनको नयाँ मोडालिटी लागू गरेको छ । तर, सरकारले संचालन गर्न तोकेका व्यापार व्यवसायले समेत मापदण्ड पुरा गरेका छैनन् । अहिले सडकदेखि बजारसम्म मानिसले कोरोना संक्रमणको वेवास्ता गर्दै आफ्नो दैनिकी सञ्चालन गरेको देखिन्छ ।