काठमाडाैं । जङ्गली जनावरबाट जोगाउन मकवानपुरको मनोहरी गाउँपालिका वडा नं ७ को रमोली बस्तीमा ३८ लाखको लागतमा विद्युतीय तार जडान कार्य सुरु गरिएको छ ।
पर्सा राष्ट्रिय निकुञ्जको ३८ लाखको लगानीमा करिब छ किलोमिटरको दूरीमा विद्युतीय तार लगाउने कार्य सुरु गरिएको हो । जङ्गली जनावर बस्तीमा पसेर तरकारी, फलफूल नष्ट गर्नाका साथै मानवीय एवं भौतिक क्षति पुर्याउने गरेको हुँदा त्यसलाई रोक्न विद्युतीय तार लगाउने कार्य सरु गरिएको गाउँपालिका अध्यक्ष एकराज उप्रेतीले जानकारी दिए ।
गाउँपालिका क्षेत्रमा पर्सा राष्ट्रिय निकुञ्जबाट आउने हात्ती, गैँडा, बाँदरलगायतका जनावरले वर्षेनी क्षति पुर्याएकाले तार लगाउने काम सुरु भएको गाउँपालिका अध्यक्ष उप्रेतीको भनाइ छ ।
गत वर्ष पनि जङ्गली जनावरको आक्रमणमा परी त्यहाँ दुईजनाको मृत्यु भएको थियो । विद्युतीय तार लगाउँदा जनावार नमर्ने, तर विद्युतीय झट्का लागेर तारबार पार गर्न नसकिने उनकाे भनाइ छ ।
गाउँपालिकाको वडा नं १ देखि ५ सम्म पनि जङ्गली जनावरको अत्यन्त जोखिम रहेको पर्सा राष्ट्रिय निकुञ्जले त्यहाँ पनि विद्युतीय तार लगाउन पहल गर्ने गाउँपालिकाले जनाएको छ ।
