काठमाडौं । भारत हुँदै नेपाल प्रवेश गरेको सलह किरा काठमाडौंसम्म आइपुगेको छ ।
यस विषयमा राष्ट्रिय बालीविज्ञहरु के गर्ने भनी बैठक गरिरहेका बेला सो किरा नेपालका प्रमुख सहर मानिने पोखरा र काठमाडौंमै देखिएका छन् ।
सो किराबारे राष्ट्रिय चासो भइरहेका बेला सुदूरपश्चिम प्रदेश सरकारले भने एक किलो सलह किरा मारेर ल्याउने व्यक्तिलाई प्रति किलो २५ रुपैयाँ पुरस्कार दिने घोषणा गरेको छ ।
सुदूरपश्चिम प्रदेशको भूमि व्यवस्था कृषि तथा सहकारी मन्त्रालयका प्रवक्ता खगेन्द्र प्रसाद शर्माले आइतबार यस्तो निर्णय गरिएको बताए ।
उनले भने, ‘अहिलेसम्म सुदूरपश्चिम प्रदेशमा सहलको प्रभाव परेको छैन । तर, भइहालेमा त्यसलाई मारेर ल्याउनेलाई प्रतिकिलो २५ रुपैयाँ दिने निर्णय गरेका छौँ ।’
यसका अलवा सो प्रदेशले मन्त्रालयले कृषि विकास निर्देशनालयको नेतृत्वमा तीव्र उद्धार समितिसमेत गठन गरेको छ ।
सलह किरा नियन्त्रणका लागि सुदूरपश्चिम प्रदेशले ८८ वटै स्थानीय तहलाई रकम उपलब्ध गराउन निर्देशन पनि दिइएको बताइएको छ ।
यसअघि प्रदेश ५ ले पनि एक किलो सलह समाते २० रुपैयाँ दिने निर्णय गरेको थियो ।
