काठमाडौं । आज आइतबार विभिन्न देशमा श्रम गर्न गएका ९२१ जना नेपालीहरू नेपाल फर्किएका छन्।
उनीहरुमध्ये अधिकांश विदेशमा अलपत्र परेर स्वदेश फर्किएका हुन् । विभिन्न मुलुकबाट अलपत्र नेपाली फर्काउन अहिले धमाधम चार्टर्ड उडान भइरहेका छन् । आज नेपाल एयरलाइन्सले चार, हिमालय एयरलाइन्सले दुई, जजीरा एयरले दुई र फ्लाइट दुबईले दुई उडान गरेका छन् ।
नेपाल एयरलाइन्सले साउदी अरेबियाको रियादबाट २४६ यात्रु र एक बच्चा ल्याएको छ। सोही एयरलाइन्सले कतारको दोहाबाट १४६ यात्रु र तीन बच्चा ल्याएको छ । यस्तै हिमालय एयरलाइन्सले अबुधाबीबाट १५२ यात्रु र एक बच्चा, मलेसियाबाट २१ यात्रु ल्याएको छ।
जजीरा एयरले कुवेतबाट १६१ यात्रु र पाँच बच्चा ल्याएको छ । त्यसैगरी फ्लाइट दुबईले १८४ यात्रु र पाँच बच्चा ल्याएको छ।
नेपाल एयरलाइन्सले २४, हिमालय एयरलाइन्सले १९ र २४ वटा विदेशी एयरलाइन्सले नेपाली नागरिकलाई उद्दार गरी नेपाल ल्याउनकाे लागि स्विकृति पाएअनुसार धमाधम उद्दारका काम भइरहेकाे हाे ।
