अमेरिकाका लागि नेपाली राजदूत डा.अर्जुन कार्कीले लकडाउनका कारण अमेरिकामा रोकिएका नेपालीलाई स्वदेश फर्काउन चार वटा जहाजको व्यवस्था मिलाएका छन् ।

अमेरिकाबाट नेपाल उड्ने उडान तालिकामा भने हेरफेर भएको छ । राजधानी वासिङ्टन डिसी, न्युयोर्क, सिकागो र डल्लास टेक्ससबाट कतार एयरवेज र टर्किश एअरलाईन्सका चार वटा जहाजको चार वटा उडानबाट नेपालीहरू स्वदेश फर्कन पाउने भएका हुन् ।

नयाँ उडान तालिका वासिङ्टन डिसीस्थित नेपाली दूतावासको वेबसाइटमा प्रकाशित छ ।

दूतावासले जारी गरेको नयाँ प्रेस विज्ञप्ति अनुसार जुन २३ तारिखमा टर्किस एयरलाइन्सले न्यूयोर्कबाट २२:३० बजे र जुन २४ तारिखमा सिकागोबाट उडान भर्नेछ ।

यस्तै जुन २४ मा कतार एयरवेजले वासिंटन डिसीबाट १०:०० बजे र २५ तारिखमा टेक्सस डल्लासबाट १८:१० बजे नेपालका लागि उडान भर्नेछ । दूतावासले दुवै एयरलाइन्सका ट्राभल एजेन्सीहरुसँग सम्पर्क गरी टिकट बुकिङ गर्न भनेको छ ।

दूतावासले नेपाल फर्किने चाहना भएकाहरूले अनलाइनमार्फत फर्म भरेकाहरूको सूची सम्बन्धित विमान कम्पनीलाई उपलब्ध गराइसकेको जनाएको छ । यदि कसैको छुटेको भए दूतावासले जारी गरेको फर्म यथाशक्य भर्न आग्रह गरेको छ । दूतावासले नेपाल फर्किनका लागि सम्बन्धित विमान कम्पनीले तोकेका आधिकारिक एजेन्सीको नम्बरमा सम्पर्क गर्न भन्दै सम्पर्क नम्बर समेत राखिदिएको छ ।

हवाई यात्राका लागि नेपाली पासपोर्ट वा नेपाल सरकारबाट जारी भएको यात्रा अनुमति पत्र अर्थात् ट्राभल डकुमेन्ट अनिवार्य साथमा हुनुपर्नेछ । यस्तै यात्रुहरूले पिसिआर वा आरडिटी टेस्ट अनिवार्य गरेको हुनुपर्ने छ ।

यस्तै नेपाल फर्किएपछि सरकारले तोकेको स्थानमा अनिवार्य क्वारेनटाइनमा बस्नुपर्नेछ । सरकारले तोकेको भाडा अनुसार अमेरिकाबाट नेपाल फर्किने यात्रुले टर्किस विमान कम्पनीबाट यात्रा गर्दा कर सहित १ हजार ५ सय ३७ अमेरिकी डलर तिर्नुपर्नेछ ।

कतार एयरवेज कम्पनीबाट यात्रा गर्दा कर सहित १६ सय अमेरिकी डलर तिर्नुपर्नेछ ।

अमेरिकामा रोकिएका नेपालीलाई स्वदेश फर्काउन व्यवसायी तथा बतास अर्गनाईजेसनका शान्ताराज बतासले महत्त्वपूर्ण भूमिका निर्वाह गर्दै आएका छन् ।

बतासले स्वदेश फर्कनेहरुलाई एकीकृत गर्नेलगायत दूतावासदेखि सम्बन्धित निकायलाई ध्यानाकर्षण गराउँदै आएका छन् । 

नयाँ उडान तालिका यस प्रकार छ