काठमाडौं । लकडाउनको समयमा नेपाली सेनाका लेफ्टिनेन्ट कर्नेलले चलाएको कार र मोटरसाइकल आपसमा ठक्कर खाँदा एक युवकको मृत्यु भएको छ ।
नेपाली सेनाका लेफ्टिनेन्ट कर्णेल शेखर जबरा सवार कारको ठक्करबाट मोटरसाइकल चालकको मृत्यु भएको हो ।
शुक्रबार बिहान साँढे सात बजे रविभवनमा भएको दुर्घटनामा मोरङ बेलबारीका २३ वर्षीय युवक टीकाराज गेलालको मृत्यु भएको हो ।
कलङ्कीबाट कालीमाटीतर्फ आइरहेको नेपाली सेनाका लेफ्टिनेन्ट कर्नेल शेखर जबरा सवार बा २१ च ४३४७ नम्बरको कारमा बा ७२ प ८१७२ नम्बरको मोटरसाइकल ठोक्किएर दुर्घटना भएको प्रहरीले जनाएको छ ।
कालीमाटीबाट तीब्र गतिमा कलंकीतर्फ गएको मोटरसाइकल चालकले सन्तुलन गुमाउँदा विपरीत लेनमा गई कारसँग ठोक्किन पुगेको प्रहरीको भनाइ छ ।
दुर्घटनामा गम्भीर घाइते भएका गेलालको नेपाल नेशनल अस्पतालमा उपचारको क्रममा मृत्यु भएको प्रहरीले जनाएको छ ।
दुर्घटनापछि लेफ्टिनेन्ट कर्नेल जबरालाई नियन्त्रणमा लिइएको छ ।
