काठमाडौं । महानगरीय प्रहरी वृत्त, महाराजगञ्जका डिएसपी उमेशराज लम्साललाई जिम्मेवारीबाट हटाइएको छ ।
लकडाउन उल्लंघन गरेको भन्दै प्रहरीले चिकित्सकलाई कुटपिटको घटना सार्वजनिक भएपछि लम्साललाई महानगरीय प्रहरी आयुक्तको कार्यालय, रानीपोखरीका तानिएको हो ।
बुधबार साँझ भएको घटनाबारे छानविनका लागि एसएसपी किरण बज्राचार्यको नेतृत्वमा एसपी मुकेश सिंह र डिएसपी होविन्द्र बोगटी सदस्य रहेको समिति गठन भएको थियो ।
समितिको प्रतिवेदनका आधारमा चिकित्सक कुटपिटमा संलग्न प्रहरीमाथि कारबाही हुने भनिएको थियो ।
तर, समितिले अनुसन्धान थाल्नु अगावै लम्साललाई जिम्मेवारीबाट हटाइएको छ ।
रानीपोखरीका डिआइजी विश्वराज पोखरेलले लम्साललाई छानबिनका लागि रानीपोखरी बोलाइएको जानकारी दिएका छन् ।