काठमाडौं । भारतको केन्द्र सरकार र प्रदेश सरकार बीचको असहमतिको मारमा सीमावर्ती नेपाली बजार परेको छ ।
भारतको केन्द्र सरकारको नीतिविपरित पश्चिम बङ्गाल सरकारले भारतीय नाकाबाट नेपाल प्रवेश गर्ने सबै सवारी साधनलाई गत चैत २६ गतेदेखि बन्द गरिदिएको हो ।
त्यसको औपचारिक जानकारी भारतको केन्द्र सरकारलाई दिइएको छैन ।
पश्चिम बङ्गाल सरकारले नेपालतर्फ मात्रै नभएर बंगलादेश र भुटानका नाकाहरु पनि सिल गरेको छ ।
नेपालको सुतियापोखरी र पानीट्याङ्की भन्सार कार्यालयका साथै बंगलादेशतर्फको फूलबारी नाका र भुटानतर्फ जाने सबै नाका बन्द गरेको छ ।
मेची भन्सार कार्यालयमा प्रमुख ध्रुवराज विश्वकर्माले एक सातादेखि सो भन्सारबाट गाडी आउन नसकेको जानकारी दिए ।
‘२६ गतेदेखि यो नाका भएर गाडी प्रवेश गर्न दिइएको छैन । त्योभन्दा अघि ग्यास बुलेट र तरकारीहरु दैनिक रुपमा आइरहेको उनले बताए ।
यो विषयमा भन्सार विभाग, भारतस्थित नेपाली दूतावास र भारत सरकारलाई समेत जानकारी गराइसकेको उनले बताए ।
भारतको केन्द्र सरकारले भने आहिलेसम्म यसबारे आफूलाई केही जानकारी नभएको भनेको छ ।
तर पश्चिम बंगाल सरकारले भन्सार सबै भन्सार कार्यालयलाई पत्र पठाएर कोरोनाभाइरस महामारीको अन्त्य नभएसम्म भन्सार सिल गर्न निर्देशन दिएको आफूहरुलाई जानकारीमा आएको समेत भन्सार प्रमुख विश्वकर्माले बताए ।
