कैलाली । देश लकडाउनमा परेपछि कैलालीको टीकापुरका केरा किसानका केरा बारीमा नै कुहिन थालेका छन् । किसानको उत्पादन भएको केरा बजारमा जान नपाएपछि बारीमै सड्न थालेको हो । 

आफूहरूको करोडौंँ मूल्य पर्ने केरा बारीमा सड्न थालेको उनीहरूको गुनासो छ ।  ‘‘केरा कृषकका लागि चैत महिना राम्रो बिक्री हुने समय हो । केरा राम्रो उत्पादन भए पनि बजारमा जान नपाएपछि समस्या भएको छ ’’, कृष्ण वागवानी केरा फर्म टीकापुरका सञ्चालक विनोदकुमार शाहले भने, ‘‘हामी त घाटामा गयौँ, दैनिक लाखौंँको केरा खेर गइरहेको छ ।’’  

शाहले अहिलेसम्म करीब ३० लाखको केरा नोक्सान भइसकेको बताए। ‘‘अझै कति दिन लकडाउन हुन्छ थाहा छैन । केरा दैनिक बोटमै पाकेर झर्न थाले’’,  शाहले भने, ‘‘यो आउंँदो वर्षका लागि तयार हुंँदै गरेका केरालाई मलजल गर्ने, स्याहार्ने समय पनि हो ।  लकडाउनका कारण कामदार पनि घर फर्किएका छन् । केराको स्याहारसमेत गर्न सकिएको छैन ।’’ असी बिघामा केरा खेती गर्नुभएका शाहका अनुसार यसको असर अर्को वर्ष उत्पादन हुने केरामा पनि पर्नेछ । उनी केरा व्यवसायीको उत्पादन सहज बजारसम्म पुग्ने व्यवस्था गराउन सरकारसँग माग गर्छन् । 
मंगलदीप एग्रिकल्चर फर्मका सञ्चालक नेपबहादुर चौधरीले पनि लकडाउन लम्बिँदै गएकाले  ११ लाख बराबरको केरा खेर जाने अवस्था आएको बताए। तेह्र बिघामा व्यावसायिक रुपमा केराखेती गरेका चौधरीले हाल दैनिक तीन सय दर्जन केरा स्थानीय सरकारलाई सहयोग गरिरहेकाे बताए । ‘‘बारीमा केरा सडिरहेको छ, त्यसैले क्वारेन्टाइमा बसेकालाई सहयोग गरिरहेको छु’’, चौधरी भन्छन्, ‘‘उपभोक्ताले खान पाएका छैनन्, हाम्रो केरा खेर गएको छ । के गर्ने, विश्व नै समस्यामा छ ।’’

अंशु एण्ड नर्सरी कृषि फर्मका सञ्चालक रामबहादुर कुंँवर पनि करीब रु २७ लाख बराबरको केरा कुहिएर खेर गएको बताउछन् । ‘‘टीकापुरको केरा नेपालका सबैजसो जिल्लामा जान्थ्यो, अहिले जान पाएको छैन, सबै कृषकको केरा बारीमै सडेको छ’’,  कुंँवर भन्छन्, ‘‘हामी ऋण गरेर व्यवसाय गरेका कृषक निकै समस्यामा पर्ने देखिएको छ ।’’

कैलालीको टीकापुरमा ७५० हेक्टरमा केराखेती गरिएको टीकापुर नगरपालिका, कृषि शाखाले जनाएको छ । केराखेती विस्तारमा रानी जमरा कुलरिया सिँचाइ आयोजना कृषि कार्यक्रम  नगरपालिकाले पनि सहयोग गर्दै आएका छन् ।