व्यवसायी दीपक मल्होत्राले यही शनिबारबाट दैनिक ७० हजार मास्क उत्पादन गर्ने भएका छन् । मल्होत्राले नेपाल चेम्बर अफ कमर्सको सहकार्यमा मास्क उत्पादन गर्न लागेका हुन् ।
कोरोना भाइरस (कोभिड–१९) फैलिन सक्ने त्रासका बीच मास्क अभाव भएका बेला मल्होत्राले ठूलो मात्रामा मास्क उत्पादन गर्न लागेका हुन् ।
मल्होत्राले बिहीबार र शुक्रबार मेसिन जडान गर्ने र शनिबारदेखि उत्पादन सुरु गर्ने तयारी भएको जनाएको छ ।
मल्होत्राले शनिबारबाट उत्पादन हुने मास्कको मूल्य ५ रुपैयाँदेखि ७ रुपैयाँसम्म रहने बताएका छन् ।
मास्क उत्पादन गर्ने मेसिन खरिदमा सरकारले भन्सार छुटलगायतका सुविधा दिने प्रस्ताव गरे पनि उक्त सुविधा आफूले नलिएको मल्होत्राले बताए । उनले मेसिनमा खासै ठूलो लगानी नभएकाले उक्त लगानी आफूले नै गरेको मल्होत्राले बताए ।
