गोरखा । आ बिहान गोरखामा जीप दुर्घटना भएको छ । उक्त घटनामा जीप दुर्घटना हुँदा एकै गाउँका १० जना घाइते भएको प्रहरीले जनाएको छ भने चार गम्भीर घाइतेलाई थप उपचारको लागि काठमाडौं लैजान हेलिकोप्टर मगाइएको छ ।
बारपाक सोलिकोट गाउँपलिका–४ सौरपानीबाट गोरखाबजारतर्फ आइरहेको बा १५ च १०१६ नम्बरको जिप मंगलबार बिहान ७ः०० बजे केउरामा दुर्घटना भएको प्रहरीले जनाएको छ ।
ब्रेक फेल भएर जिप दुर्घटना भएको अनुसन्धानबाट खुलेको प्रहरीको भनाई छ । जिप सडकबाट करिब १ सय मिटर तल खसेको थियो । ट्राफिक प्रहरी कार्यालय गोरखाका इञ्चार्ज सुकबहादुर बिकका अनुसार दुर्घटनामा घाइते हुनेमा विमला गुरुङ, रमा गुरुङ, बुद्धबहादुर गुरुङ, श्रीमान् गुरुड, क्षेत्रकुमारी गुरुङ, टेकमाया गुरुङ र उनकी ६ वर्षीया छोरी सुनीता रहेका छन् ।
सोही दुर्घटनामा परी सुकमाया गुरुङ, विनोद गुरुङ, राजकुमारी गुरुङ र चालक आनन्दकुमार गुरुङ पनि घाइते भएका छन् । घाइते सबै रञ्चोकका हुन् ।
घाइते मध्ये विमला, रमा, क्षेत्रकमारी र सुकमायाको अवस्था गम्भीर रहेको प्रहरीले जनाएको छ । गम्भीर घाइतेलाई थप उपचारको लागि काठमाडौं लैजानुपर्ने भएपछि माउन्टेन एयरको हेलिकोप्टर मगाइएको छ ।
