रुकुम । रुकुम (पूर्व)को सिस्ने गाउँपालिका–५ कमलदह नजिकै मृग (रतुवा) फेला परेको छ ।
डिभिजन वनकार्यालय रुकुम (पूर्व)का डिभिजनल वन अधिकृत बेसिन्द्रराज सुवेदीले दहमा पानी खाएर फर्कदै गरेको (दारे) भाले मृग दहतीर घुम्न निस्किएको वेलामा आइतबार फेला पारेको जानकारी दिए ।
नेपाली सेनाको सहयोगमा मृगलाई नियन्त्रणमा लिइएको डिभिजनल वन अधिकृत सुवेदीले बताए ।
मानिसलाई देखेर अताल्लिएर भाग्न खोजेपछि तारको जालीमा ठोक्किएर मृगको मुखमा चोट लागेको सहायक वन अधिकृत सुजन राजभण्डारीले जानकारी दिए ।
उनका अनुसार अहिले मृगको उपचार भइरहेको र वन कार्यालयमा सुरक्षित राखिएको छ ।
मृगलाई आज वनमा लगेर छोडिने पनि उनले जानकारी दिए ।
पछिल्लो चरणमा मृग बजारतिर झरिरहेका छन् ।
गएको महिना पनि वन कार्यालय बसेको घरकै रेलिङमा अल्झिएको अवस्थामा मृग फेला परेको थियो ।
जङ्गलमा मान्छेको चहलपहल, खानाको अभाव, पानीका मुहान सुक्दै जान थालेसँगै जङ्गली जनावर बस्तितिर झर्न थालेका हुन् ।