रौतहट । रौतहटमा सहकर्मीलाई जबरजस्ती करणी गरेको आरोपमा पोलीक्लिनिक सञ्चालक चिकित्सक (अहेब) पक्राउ परेका छन् ।
गरुडा ४ मा अर्चना पोलीक्लिनिक एवं रिसर्च सेन्टर सञ्चालन गर्दै आएका मौलापुर नगरपालिका ५ निवासी ३५ बर्षिय श्यामशुन्दर पटेल पक्राउ परेका हुन् ।
आफनै क्लिनिककी महिला सहकर्मीलाई जवरजस्ती करणी गरेको आरोपमा 'अहेब'लाई पक्राउ गरेको प्रहरीले जानकारी दिएको छ ।
पीडित महिलाको जाहेरीको आधारमा अहेव पटेलमाथी जबरदस्ती करणी सम्बन्धी मुद्धा दर्ता गरी जिल्ला अदालत गौरबाट ५ दिनको म्याद थप गरी अनुसन्धान भईरहेको इलाका प्रहरी कार्यालय गरुडाका प्रमुख डिएसपी ज्ञानकुमार महतोले जानकारी दिए ।
पीडित महिला र आरोपी पटेलको जिल्ला अस्पताल गौरमा स्वास्थ परिक्षण गरिएको प्रहरीले जानकारी दिएको छ ।
पटेलले दुई बर्षदेखि गरुडामा पोलीक्लिनिक सञ्चालन गर्दै आएका थिए ।
पोलीक्लिनिकमा कार्यरत महिलाले आफूलाई 'विवाह गर्ने प्रलोभन देखाएर' पटक–पटक यौनशोषण गरेको प्रहरीसमक्ष जाहेरी दिएकी छिन् ।
पटेलले करणी गरेपछि आफू तीन महिनाको गर्भवती रहेको समेत पीडित महिलाले बताएकी छिन् ।
यस घटनामा प्रहरीले थप अनुसन्धान सुरु गरेको छ ।
