सर्लाहीकाे लालबन्दी नगरपालिका–२ स्थित लर्ड ब्राइट विज्डम इङ्लिस स्कुल नवलपुरको निर्माणाधीन होस्टल भवनमा एक विद्यार्थीले आत्महत्या गरेका छन् । साेही विद्यालयमा अध्ययनरत अमन चौधरी झुण्डिएकाे अवस्थामा फेला परेपछि यातना सहन नसकेर आत्महत्या गरेको परिवारजनले दाबी गरेका छन् ।
चौधरीका बुबा अस्मिनकुमारका अनुसार यातना सहन नसकेकै कारण तन्नाको पासो लगाएर झुण्डिन बाध्य भएका हुन् । विद्यालयकै कारण छोराको ज्यान गएको भन्दै उनले घटनाको गम्भीर ढंगले छानविन गर्न मागसमेत गरेका छन् । चौधरीका परिवार तथा आफन्तले मंगलबार साँझ एक घण्टा विद्यालय अगाडि बालकको शवसहित प्रदर्शन समेत गरे ।
विद्यालयका प्रिन्सिपल सुदिप कार्कीले भने परिवारजनले लगाएको आरोप निराधार रहेको दावी गरेका छन् । घटनाको विषयमा सुक्ष्म ढंगले अनुसन्धान भइरहेको जिल्ला प्रहरी कार्यालय मलंगवाले जनाएको छ । विद्यालयको कक्षा ८ मा अध्ययनरत चौधरीलाई होस्टलको निर्माणाधीन भवनमा तन्नाको पासो लगाएर झुण्डिएको देखेलगत्तै अन्य विद्यार्थी तथा शिक्षकले उद्धार गरेर तत्काल नमुना अस्पताल पुर्याएका थिए । तर अस्पतालले चौधरीलाई मृत घोषणा गरेको थियो ।
