नयाँ बसपार्क शुद्धीकरण अभियान अन्तर्गत प्रहरीले काठमाडौंको गोंगबु नयाँ बसपार्कक्षेत्रमा गरेको ‘स्विप अपरेसन’ मा ५७ जना पक्राउ परेका छन् ।
अवैध कार्यमा संलग्न रहेको आशंकामा उनीहरुलाई नयाँ बसपार्कक्षेत्रबाट नियन्त्रणमा लिएको हो । पक्राउ पर्नेमा अवैध यौन धन्दा, घरेलु मदिरा बिक्री बितरिण, चोरीलगायतका कार्यमा संलग्नहरु रहेका महानगरीय प्रहरी वृत्त, महाराजगञ्जले जनाएको छ ।
गोंगबु नयाँ बसपार्क क्षेत्रभित्र हुने अनाधिकृत कार्य रोक्न प्रहरीले शुद्धीकरण अभियान चलाएको हो ।
पक्राउ पर्नेमा सनकाजी दर्जी, विनोद भट्टराई, विष्णु थापा, नरेन्द्र पोमु, अशोक पोमु, कमल काराखेती, सोमबहादुर तामाङललगायत छन् ।
नियन्त्रणमा रहेका सानुकाजी जबरजस्ती करणीका फरार अभियुक्त हुन् । पक्राउ परेका सबै ५७ जनालाई महानगरीय प्रहरी वृत्त, महाराजगञ्जमा राखेर अनुसन्धान भइरहेको वृत्तका डीएसपी उमेश लम्सालले जानकारी दिए ।
अपरेसनका क्रममा प्रहरीले १ सय लिटर अवैध घरेलु मदिरा पनि नष्ट गरेको छ ।
गोंगबु नयाँ बसपार्क क्षेत्रभित्र हुने अनाधिकृत कार्य रोक्न प्रहरीले पछिल्लो पटक शुद्धीकरण सुरु गरेको हो । जसअन्तर्गत यसअघि थुप्रै पक्राउ परिसकेका छन् ।
