सभामुख कृष्णबहादुर महरामाथि संसद सचिवालयकी एक कर्मचारीलाई दुर्व्यवहार गरेको आरोप लागेको छ ।
संसद सचिवालयमै कार्यरत एक महिला कर्मचारीले आफ्नो निवासमै आएर सभामुखले असामान्य व्यवहार गरेको आरोप लगाएकी छिन् ।
सभामुखले भने कर्मचारी समायोजनमा बाहिर सरुवा भएको रिस पोखेको बताएका छन् । यो प्रकरणपछि किन केही प्रश्न उठेका छन् ।
१. आइतबार साँझ ती महिलाको निवासमा सभामुख किन पुगे ? ती महिलाका पतिसँगसमेत चिनजान भइरहेका सभामुख त्यहाँ किन बारम्बार गइरहन्थे ?
२. सभामुखको दुर्व्यवहारपछि ती महिलाले प्रहरीलाई खबर गरेको र त्यसपछि प्रहरी आएर आफ्नो घर तथा कोठाको फोटो र भिडियोसमेत खिचेको बताएकी छिन् । यति हुँदा पनि घटनालाई किन गुपचुप राख्यो प्रहरीले ?
३. आफूमाथि दुर्व्यवहार गरेको आरोप लगाउने महिलाले किन लिखित जाहेरी दिइनन् ?
४. कर्मचारी समायोजनमा असन्तुष्ट भएकै कारण ती महिलाले नियोजित षड्यन्त्र गरेको भए किन निजलाई पक्राउ गरी कानुनी कारवाही अघि बढाइएन ? मुलुकी अपराध संहिताले गलत नियतले कसैलाई फसाउन खोजे त्यस्तो व्यक्तिलाई पनि कारवाही गर्ने प्रावधान राखेकोमा त्यसलाई किन नजरअन्दाज गरिएको हो ?
