नेपालको बैंकिङ प्रणाली ह्याक गरी करोडभन्दा बढी रकम लुटपाट गर्ने चिनियाँ समूहलाई पक्राउ गरेको एक महिना बित्न नपाउँदै फेरि बैंक तथा वित्तीय संस्थाहरुबाट ५ अर्बभन्दा बढी रुपैयाँ ह्याक गरी विदेश लैजाने योजना विफल बनाउन नेपाल प्रहरी सफल भएको छ ।
महानगरीय प्रहरी अपराध महाशाखाले नेपालका बैंक तथा वित्तीय संस्थाको प्रविधि ह्याक गरी ५ अर्ब रुपैयाँभन्दा धेरै रकम विदेश लैजाने योजनामा संलग्न १२ जनालाई बुधबार सार्वजनिक पनि गरेको छ ।
प्रहरीले उनीहरुको साथबाट ४० लाख ५० हजार रुपैयाँ समेत बरामद गरेको छ । अन्यको बारेमा भने थप अनुसन्धान भइरहेको प्रहरीले जनाएको छ । यो समाचार कारोबार दैनिकले छापेको छ ।
कृषि विकास बैंकको लहान शाखाबाट ७३ लाख ९६ हजार रुपैयाँ ह्याक गर्ने क्रममा उनीहरु पक्राउ परेका हुन् । यस्तै प्रहरीले उक्त घटनामा बैंककै कर्मचारीको पनि मिलेमतो हुनसक्ने भन्दै थप अनुसन्धान भइरहेको जनाएको छ ।
