लत्ताकपडा, सवारी साधनलगायत बन्दोबस्तीका सामान खरिदमा घोटाला भएको आशंकामा अख्तियार दुरुपयोग अनुसन्धान आयोगले प्रहरी प्रधान कार्यालयबाट पछिल्ला २ वर्षका कागजात नियन्त्रणमा लिएको छ ।
अख्तियारको विशेष टोलीले नेपाल प्रहरी मुख्यालयस्थित प्रशासनिक विभाग अन्तर्गतका आर्थिक प्रशासन महाशाखा र प्रबन्ध शाखाबाट विभिन्न पोसाक, सवारी साधनलगायत बन्दोबस्तीका सामान खरिदका सक्कली कागजात लगेको छ ।
प्रहरी मुख्यालयलाई पत्र लेखेर खरिदका आवश्यक कागजात उपलव्ध गराउन निर्देशन दिँदा अटेर गरिएकाले आफैँ गएर नियन्त्रणमा लिइएको अख्तियार उच्च स्रोतले जनाएको कान्तिपुर दैनिकका लागि मातृका दाहालले लेखेका छन् ।
भीभीआईपी, भीआईपीका लागि ३० वटा एस्कर्टिङ मोटरसाइकल खरिद, बुट, सर्ट, पाइन्ट, पिकअप भ्यान, मेसिन, औजार लगायतका समान खरिदमा अनियमिता भएको अख्तियारको आशंका छ ।
त्यसैगरी गुणस्तर परीक्षणमा फेल भएर फिर्ता गरिएका डीएम बुट स्वीकार गरेर अनियमितता गरिएको अख्तियारले जनाएको छ ।
