टेलिभिजन प्रस्तोता रवि लामिछानेलाई हिरासतमा राखेर अनुसन्धान अघि बढाउन माग गर्दै निवेदन परेको छ ।
पत्रकार शालिकराम पुडासैनी आत्महत्या दुरुत्साहनको अभियोगमा धरौटीमा छुटेका रविसहित तीनै जनालाई पुर्पक्षका लागि थुनामा राख्न निवेदन परेको हो ।
जिल्ला अदालत चितवनले धरौटी र साधारण तारेखमा छोड्ने आदेशविरुद्ध सरकारी वकिलको कार्यालयले निवेदन दिएको हो ।
निवेदन पाटन उच्च अदालतको हेटौंडा इजलाशमा दिइएको हो ।
निवेदनउपर भोलि मंगलबार नै सुनुवाइ हुने भएको छ ।
रवि लामिछानेले धरौटी, घटनाबारे सार्वजनिक रुपमा बोल्न नपाउने तथा विदेश भ्रमणमा रोक लगाएकोलगायतका विरुद्ध निवेदन दिएपछि सरकारी वकिलको कार्यालयले यस्तो निवेदन दिएको हो ।
सरकारी वकिलको कार्यालयले जिल्ला अदालतको धरौटी र साधारण तारेखमा छोड्ने आदेश बदर गरी उनीहरुलाई पुर्पक्षका लागि थुनामा पठाउन माग गरेको छ ।
सरकारी वकिल कार्यालयले जिल्ला अदालतमा अभियुक्त तीनै जनालाई ५ वर्ष कैद र ५० हजार जरिवान माग दावी गर्दै अभियोग पत्र दायर गरेको थियो ।
चितवन जिल्ला अदालतले रविलाई पाँच लाख, युवराज कँडेललाई तीन लाख र अस्मिता भन्ने रुकु कार्कीलाई साधारण तारेखमा रिहा गरेको थियो ।
