गैरआवासीय नेपाली संघ (एनआरएनए) को आगामी अक्टोबरमा हुने सम्मेलनको तयारीसँगै प्रतिस्पर्धा पनि जारी छ ।
चुनावी माहौलसँगै एनआरएनएको अबको नेतृत्व कसले लिने भन्ने चर्चा चल्न थालेको छ ।
यसपटकको विश्व सम्मेलनमा नीति र नेतृत्व दुवैले प्राथमिकता पाउने देखिएको छ । खासगरी एकेडेमिक व्यक्तित्वहरूले पनि संगठनको नेतृत्वमा रुचि र अग्रसरता बढाएका छन् ।
अध्यक्षमा डा. बद्री केसीको उम्मेदवारी पक्कापक्की भएको छ । यसअघिका प्रत्याशी कुल आचार्य पनि मैदानमा आउने सम्भावना छ । उपाध्यक्षमा डा. हेमराज शर्माको नाम चर्चामा छ । त्यसैगरी उपाध्यक्षमा महेश श्रेष्ठसमेतको नाम पनि सुनिएको छ ।
कोरियामा रहेका डा. देवीबहादुर बस्नेतले सचिवमा उम्मेदवारी दिँदै छन् । यसअघि सचिवमा प्रत्याशी भइसकेका डा. बस्नेतको उम्मेदवारीलाई हेभिवेट मानिएको छ । तर उनले अझै औपचारिक रूपमा उम्मेदवारी घोषणा गरिसकेका छैनन् ।
संखुवासभामा जन्मिएर मोरङको तत्कालीन सिजुवा ७ (हालको रतुवामाई नगरपालिका ६) मा हुर्किएका बस्नेत सानैदेखि मेधावी छात्र थिए । उनको पढाइ र लगनशीलता देखेर स्थानीय सौँठा माविका शिक्षक निकै गर्व गर्दथे ।
उनले त्रिभुवन विश्वविद्यालयबाट स्नातकोत्तर (एमएससी) गरेका थिए । अध्ययन र अनुसन्धानले उनलाई कोरिया पुर्यायो । अहिलेको उनको कर्मभूमि हो कोरिया ।
विराटनगरस्थित महेन्द्र मोरङ आइएससी र बीएससी गरेका उनले त्रिविबाट जैविक विज्ञानमा विशिष्टता गरेका थिए । डा. बस्नेतले एमएससीमा क्यान्सर निको पार्ने केमिकल (ट्याक्सोल छुट्याउने र त्यसको विशेषताको पहिचान गर्ने) को बारेमा अनुसन्धान गरेका थिए ।
मिलनसार स्वभावका बस्नेत कोरियाबाट सन् २००५ मा जीव रसायनमा पिएचडी गरेका हुन् ।
डा. बस्नेत सामाजिक क्षेत्रमा पनि क्रियाशील छन् । उनले नेपाली समाज तथा नेपालको आर्थिक विकासमा ऊर्जा थप्ने खालका कामहरू गर्दै आएका छन् ।
उनले कोरियामा विद्यार्थीहरूको एक मात्र संस्था (सोनसिक) को संस्थापक उपसभापति (२००४) भएर काम गरेका थिए । बस्नेत २०७२ सालमा नेपालमा भूकम्पबाट प्रभावित स्कुलहरूको मर्मतको लागि बनेको समितिको संयोजक रहेका थिए ।
बस्नेतले सन् २००६ मा एनआरएनए दक्षिण कोरियाको संस्थापक उपसभापति हुँदै एनआरएनसँगको आफ्नो यात्रा जोडेका हुन् । त्यसपछि महासचिव तथा तीन कार्यकालसम्म संरक्षक हुँदा विभिन्न नौला र रचनात्मक कामहरू गरेका थिए ।
बस्नेतले एनआरएनए आईसीसी सदस्यको रूपमा दुई कार्यकाल बिताइसकेका छन् । नेपाल बाहिर फैलिएको बौद्धिक वर्ग अझै एनआरएनएसँग आबद्ध हुन सकिरहेको छैन । डा. बस्नेतले एकेडेमिक व्यक्तित्वहरूलाई यसको मूल प्रवाहमा ल्याउनुपर्ने मान्यता राख्दै त्यसैअनुसार काम पनि गर्दै आएका छन् ।
उनले एनआरएनए आइसिसीका विभिन्न कमिटी तथा टास्क फोर्समा रहेर काम गरिसकेका छन् । उनले मुख्यतया 'स्किल, नलेज र इनोभेसन' कमिटीमा रहेर गैरआवासीय नेपाली संघमा योगदान पुर्याएका छन् । सन् २०२० मा भएको एनआरएनए एसिया प्यासिफिकको पहिलो विज्ञ सम्मेलनको संयोजक भएर बस्नेतले काम गरेका थिए ।
