काठमाडौं । अमेरिकाले सिरिया र इराकको सीमाक्षेत्रमा इरान समर्थित लडाकुलाई लक्षित गरी हवाई आक्रमण गरेको छ ।
अमेरिकाकी रक्षा मन्त्रालयले यो आक्रमण इराकमा अमेरिकी मानिसहरु र केन्द्रहरुमा गरिएको ड्रोन आक्रमणको जवाफी कारबाहीको रुपमा गरिएको बताएको छ । यो आक्रमणका लागि राष्ट्रपति जो बाइडेनले आदेश दिएको त्यहाँको रक्षा मन्त्रालयले बताएको छ ।
अमेरिकी राष्ट्रपति जो बाइडेन सत्तामा आएपछि इरान समर्थित लडाकुमाथिको अमेरिकाको यो दोस्रो हवाई आक्रमण हो ।
इराकमा करिब २५ सय अमेरिकी सैनिक छन् ।अमेरिकाको रक्षा मन्त्रालयले उक्त आक्रमणमा कति जनाको मृत्यु भएको भन्ने खुलाएको छैन । तर, सिरियन अब्जर्भेटरी फर ह्युमन राइट्सका अनुसार उक्त आक्रमणमा पाँच लडाकु मारिएका छन् ।
सिरियाको सरकारी समाचार एजेन्सी सानाका अनुसार सो आक्रमणमा एक बालकको पनि मृत्यु भएको छ भने अन्य तीनजना घाइते भएका छन् । सन् २००३ मा अमेरिकाले आक्रमण गरेयता इराकमा निरन्तर इरानको प्रभाव बढ्दो छ ।