अफगानिस्तानको दक्षिणी प्रान्त कुन्दुजमा यहाँको संयुक्त सेनाले गरेको कारबाहीमा परी कम्तीमा पनि २४ जना तालिवान आतंककारी मारिएका छन् ।
संयुक्त सेनाले गरेको कारबाहीमा परी ती लडाकु मारिएको बताइएको छ । सेनाले कुन्दुज तथा अन्य भागमा शुक्रबार रातिदेखि विशेष कारबाही सुरु गरेको थियो ।
अफगानिस्तानको दक्षिणी भूभागमा रहेको से दराक नामको प्रान्तमा शुक्रबार रातिदेखि शनिबार बिहानसम्म गरेको कारबाहीमा १६ जना लडाकु मारिएका छन् ।
ती स्थानमा भएका कारबाहीमा परेर अरू १० जना घाइते पनि भएका बताइएको छ । सेनाले कुन्दुजका प्रान्तीय राजधानीबाट केही टाढा तालिवान लडाकुलक्षित हवाई र स्थलमार्गबाट गरेको कारबाहीको क्रममा ती तालिवान लडाकुहरू मारिएका बताइएको छ ।
त्यसैगरी अफगानिस्तानको सेनाले कुन्दुज नगरमा पनि हवाई तथा स्थलगत रूपमा तालिवानका लडाकुहरूमाथि कारबाही गरेको थियो ।त्यस कारबाहीका क्रममा अरू आठ जनाको ज्यान गएको थियो । यहाँको एक स्थानीय घरमा तालिवानहरू लुकेर बसेको सूचनाका आधारमा अफगान सेनाले कारबाही गरेको थियो ।
अफगानिस्तानको सरकार र यहाँका तालिवानीबीचमा शान्ति वार्ता हुने भनिए पनि त्यो अझै हुन सकेको छैन । त्यसैले पछिल्लो समयमा तालिवानहरूले पनि यहाँका सुरक्षाकर्मीमाथि हमला गर्ने गरेका छन् ।
