कोरोना महामारीबाट अतिप्रभावित भारतमा अब १८ वर्षभन्दा माथिका सबै नागरिकले खोप पाउने भएका छन् ।
भारतीय प्रधानमन्त्री नरेन्द्र मोदीले जुन २१ देखि सबैलाई कोरोना भाइरसविरुद्धको खोप उपलब्ध गराउने घोषणा गरेका हुन् । त्यो खोप निःशुल्क हुने छ । त्यसका लागि खोपको ७५ प्रतिशत केन्द्र सरकारले खरिद गरी राज्य सरकारहरूलाई दिने मोदीले प्रतिबद्धता व्यक्त गरेका छन् ।
राष्ट्रको नाममा सोमबार सम्बोधन मोदीले यस्तो घोषणा गरेका हुन् । उनले कोभिडसँगको लडाइँमा भारत सरकारले नयाँ स्वास्थ्य संरचना तयार पारिसकेको जनाएका छन् ।
पूर्वीय दर्शनसँग लगाव रहेका मोदीले खोप योजना पनि सोहीअनुसारको मितिदेखि तय गरेका छन् । उनले खोप योजना सुरु गर्ने दिन जुन २१ योग दिवस हो ।
भारतमा अहिलेसम्म २३ करोड मानिसले खोप लगाइसकेका छन् । मोदीले बालबालिकाहरूका लागि समेत खोप परीक्षण भइरहेको जनाए । बालबालिकाका लागि तयार गरिएको खोप नाकबाट दिइने गरी परीक्षण भइरहेको उनले राष्ट्रलाई जानकारी गराए ।
भारत सरकारले हरेक विपन्न नागरिकलाई निःशुल्क खाद्यान्न वितरण गरिरहेको छ । प्रधानमन्त्री गरिब कल्याण अन्न योजना नाम दिइएको सो कार्यक्रमलाई आगामी नोभेम्बरसम्म निरन्तरता दिने मोदीले बताएका छन् ।
यो समाचार तयार पार्दासम्म भारतमा २ करोड ८९ लाख १७ हजार संक्रमित भइसकेका छन् । हाल सक्रिय संक्रमितको संख्या १४ लाख ८ हजार रहेको छ । कोभिड संक्रमणकै कारण ३ लाख ४९ हजार २९३ जनाको ज्यान गएको छ ।
