दिल्लीस्थित इजरायली दूतावासनजिक शुक्रबार साँझ भएको विस्फोटबारे अनुसन्धान गरिरहेको टोलीले केही प्रमाण फेला पारेको जनाएको छ ।
भारतीय सञ्चारमाध्यमका अनुसार दिल्ली पुलिस स्पेसल सेलले घटनाको सिसिटिभी फुटेज फेला पारेको हो ।
फुटेज (भिडियो) मा दुई जना व्यक्ति ट्याक्सीबाट ओर्लेर इजरायली दूतावासतर्फ जाँदैछन् ।
भारतीय सञ्चारमाध्यमका अनुसार चालकलाई सम्पर्क गरिएको छ र स्केच बनाइँदैछ ।
स्रोतका अनुसार सिसिटिभी फुटेजमा एक व्यक्तिले सडकछेउ राखिएको गाडीमा प्याकेट फ्याँक्दै गरेको देखिन्छ ।
दिल्ली पुलिसका अतिरिक्त जनसम्बन्ध अधिकारी अनिल मित्तलका अनुसार बम विस्फोटपछि एक जना मान्छे इजरायली दूतावासबाट बाहिर आए र भिडियाे बनाए ।
त्यसपछि साँझ ५:११ बजे प्रहरी र दमकल विभागलाई जानकारी दिइयो ।
'विस्फोट कम तीव्रताको थियो । यसमा कोही पनि घाइते भएनन् । केवल तीन कारका सिसा फुटेका छन्', मित्तलले भने ।
कुनै समूहले सनसनी (आतंक) फैलाउन यो विस्फोट गराएकाे हुनसक्ने प्रारम्भिक अनुमान गरिएकाे छ ।
