राष्ट्रपति चुनावको मतगणना जारी रहँदा अग्रता लिएका डेमोक्र्याटिक उम्मेदवार जो बाइडेनले संक्रमणकालिन वेबसाइट सार्वजनिक गरेका छन् ।
राष्ट्रपति चुनाव जित्ने उम्मेदवारले ह्वाइट हाउसको जिम्मेवारी सम्हाल्ने तयारीका लागि संक्रमणकालीन समूह बनाउनुपर्छ ।
नोभेम्बरमा हुने चुनावमा निर्वाचित हुने उम्मेदवारले जनवरीमा राष्ट्रपतिको जिम्मेवारी सम्हाल्नेछन् ।
अहिलेसम्म राष्ट्रपतिमा कुनै पनि उम्मेदवार विजयी भएको घोषणा भएको छैन । डेमोक्र्याटिक उम्मेदवार बाइडेन २५३ इलेक्टोरल मतसहित राष्ट्रपति ट्रम्पभन्दा अघि छन् । ट्रम्पको पक्षमा अहिलेसम्म २१३ मत पाएका छन् ।
दुवै उम्मेदवारले आफू विजयी हुने अपेक्षा रहेको बताएका छन् । ट्रम्पले बुधबार नै आफू विजयी भएको दाबी गरेका थिए ।
अग्रता लिएका बाइडेनले संक्रमणकालिन वेबसाइट सार्वजनिक गरेका छन् । उनले ‘ब्यूल्डब्याकबेटर’ नामको वेबसाइट सार्वजनिक गरेका हुन् ।
सो वेबसाइटमा देशले अहिले सामना गरिरहेको संकट गम्भीर रहेको र संक्रमणकालीन टिमले संकट समाधानका लागि तीव्र गतिमा काम गर्ने उल्लेख छ ।
