काठमाडौं । कोरोना संक्रमण भारतमा फैलिँदै गएको छ । संक्रमणको आधारमा भारत दोस्रो स्थानमा आइपुगेको छ ।
हिजो शनिबारसम्म सूचीको तेस्रो स्थानमा रहेको भारतले आज ब्राजिललाई उछिनेको हो । भारतमा कुल संक्रमण ४१ लाख ३१ हजार ६९० जना पुगेको छ भने ब्राजिलमा ४१ लाख २३ हजार जना संक्रमित छन् ।
सबैभन्दा बढी संक्रमित अमेरिकामा रहेका छन् । अमेरिकामा ६४ लाख ३२ हजार २०९ जना संक्रमित पुगेका छन् ।
मृत्युतर्फ भारत तेस्रो स्थानमा रहेको छ । हालसम्म भारतमा ७० हजार ८०२ जनाको मृत्यु भइसकेको छ । अमेरिकामा कोरोनाबाट एक लाख ९२ हजार ८६४ जनाको मृत्यु भएको छ भने दोस्रो स्थानमा रहेको ब्राजिलको एक लाख २६ हजार २३० जनाको मृत्यु भइसकेको छ ।