विश्व स्वास्थ्य संगठन (डब्ल्युएचओ) ले पछिल्लो २४ घण्टामा विश्वभर कोरोना भाइरस (कोभिड–१९) का दुई लाख ९४ हजारभन्दा धेरै नयाँ संक्रमित भेटिएको बताएको छ ।
डब्ल्युएचओका अनुसार पहिलोपटक एकैदिन धेरै कोरोना भाइरसका संक्रमितहरु फेला परेका हुन् ।
जोन्स हप्किन्स युनिभर्सिटीको तथ्यांकअनुसार अहिलेसम्म विश्वभर कोरोना भाइरसका दुई करोड १४ लाखभन्दा बढि संक्रमित फेला परिसकेका छन् भने सात लाख ७१ हजारभन्दा धेरै मानिसको कोरोना भाइरसका कारण मृत्यु भइसकेको छ ।
कोरोना भाइरसबाट सबैभन्दा प्रभावित बनेको अमेरिकामा अहिलेसम्म कोरोना भाइरसका ५३ लाख ६१ हजारभन्दा धेरै संक्रमित फेला परिसकेका छन् । अमेरिकामा भाइरसका कारण मृत्यु हुनेको संख्या एक लाख ७० हजार नाघेको छ ।
ब्राजिलमा कोरोना संक्रमितको संख्या ३३ लाख १७ हजार नाघेको छ । ब्राजिलमा पनि कोरोना भाइरसका कारण एक लाख ७ हजारभन्दा धेरैको मृत्यु भइसकेको छ ।
भारतमा २५ लाख ८९ हजारभन्दा धेरै संक्रमित पुगेका छन् भने मृत्यु हुनेको संख्या ५० हजारनजिक पुगेको छ ।
