अमेरिकामा कोरोना भाइरस (कोभिड–१९) भनेको ‘केही होइन’ भनेर हेलचेक्र्याइँ गर्दा एक युवकको मृत्यु भएको छ ।
टेक्सस राज्यका एक चिकित्सकका अनुसार कोरोना भाइरसलाई ख्यालख्याल ठानेर एक संक्रमित व्यक्तिले आयोजना गरेको पार्टीमा सहभागी हुँदा अर्का ३० वर्षीय युवकको मृत्यु भएको हो ।
एक भिडियोमार्फत मेथडिस्ट अस्पतालका प्रमुख स्वास्थ्य अधिकारी जेन एपलबाइले उक्त घटनाबारे जानकारी दिएकी हुन् ।
ती व्यक्तिले बताएअनुसार त्यस पार्टीको जमघटमा को पहिले संक्रमित हुने र कोरोनाबाट को–को जोगिन सक्ने भन्ने प्रतिस्पर्धा गरिएको थियो ।
ती बिरामीले मृत्यु हुनु केही बेरअघि एक नर्सलाई आफूले त्यस्तो पार्टीमा सहभागी भएर गल्ती गरेको बताएका थिए ।
कोरोना भाइरस महामारीले विश्वभर आतंक मच्चाइरहे पनि कतिपय देशमा यसलाई ख्यालख्याल ठान्ने गरिएको छ ।
खासगरी कोरोनाबाट विश्वमा सबैभन्दा पीडित अमेरिकामा कोरोनालाई हल्का रूपमा लिने गरिएको छ ।
बीबीसी
