एजेन्सी । भारतको आन्ध्रप्रदेशका मुख्यमन्त्री जगनमोहन रेड्डीले कोरोना भाइरस (कोविड–१९) को परीक्षण गराएका थिए । उनको रिपोर्ट आइसकेको छ ।
भारतीय सञ्चारमाध्यमका अनुसार उनलाई कोरोना भाइरसको संक्रमण नदेखिएको बताइएको छ ।
उनले शुक्रबार र्यापिड टेष्टमार्फत आफ्नो परीक्षण गराएका थिए ।
दक्षिण कोरिया सरकारले आन्ध्रप्रदेशलाई दिएको र्यापिड टेष्ट किटबाट उनले आफ्नो स्वास्थ्य परीक्षण गराएका हुन् ।
दक्षिण कोरिया सरकारले आन्ध्रप्रदेश सरकारलाई एक लाख र्यापिड टेष्ट किट उपलब्ध गराएको थियो ।
दक्षिण कोरियाबाट विशेष विमान चार्टर गरेर ती किटहरु ल्याइएको थियो ।
आन्ध्रप्रदेश राज्य सरकारको सचिवालयले दिएको जानकारी अनुसार ती किटहरुका माध्यमबाट अब उक्त राज्यका विभिन्न सम्भाव्यस्थलहरुमा घरघरमै पुगेर परीक्षण गरिने छ ।
सो परीक्षणपछि १० मिनेटमा नै रिपोर्ट आउने बताइएको छ । यो परीक्षण किटलाई प्रभावकारी मानिएको छ ।
छोटो समयमै यसको संक्रमण थाहा पाउन सकिने भएकोले यो परीक्षणबाट यहाँ कोविडको सम्भावित संक्रमण रोक्न सहयोग पुग्ने बताइएको छ ।
शुक्रबार ती किटहरु आन्ध्रप्रदेश राज्य सरकारलाई हस्तान्तरण गरिएको थियो ।
शुक्रबारै ती किटबाट परीक्षणको आरम्भ मुख्यमन्त्री रेड्डीलाई परीक्षण गरेर शुरु भएको थियो ।