एजेन्सी । भारतको राजधानी दिल्लीस्थित एक सरकारी अस्पतालका चिकित्सकलाई कोरोना संक्रमणको पुष्टि भएको छ ।
यसअघि मौजपुर र बाबरपुर इलाकामा रहेको क्लिनिकका चिकित्सकलाई समेत कोरोना भाइरस पोजेटिभ देखिएको थियो ।
भारतका विभिन्न राज्यमा कोरोना संक्रमितको संख्या बढ्दै गइरहेको छ ।
मंगलबार दिल्लीको बाबरपुर इलाकाको मोहल्ला क्लिनिकमा कार्यरत चिकित्सकलाई कोरोना संक्रमण भएको थियो ।
त्यसपछि स्थानीय प्रशासनले यस इलाकामा एक अपिल जारी गरेको छ । अपिलमा भनिएको छ, जो पनि बिरामी वा अन्य मानिस मार्च १२ देखि मार्च २० को बीचको समयमा उक्त क्लिनिकमा गएका थिए, उनीहरु १५ दिन आफ्नो घरमा क्वारेन्टाइनमा बस्नुहोला ।
यसअघि उत्तर पूर्वी दिल्लीको मौजपुर इलाकाको मोहल्ला क्लिनिकका चिकित्सकलाई पनि कोरोना भाइरस संक्रमण भएको थियो ।
भारतमा कोरोना भाइरसबाट १४०० व्यक्ति संक्रमित भएका छन् ।
संक्रमितमध्ये १२४ मानिस निको भइसकेका छन् । भारतमा ४९ जना विदेशी नागरिक कोरोना संक्रमित रहेको बताइएको छ ।
भारतमा कोेरोना भाइरस संक्रमणबाट ३५ जनाको ज्यान गइसकेको छ । कोरोना भाइरसबाट सबैभन्दा बढी महाराष्ट्र प्रभावित छ । महाराष्ट्रमा मात्रै १० जनाको मृत्यु भइसकेको छ ।
