मुम्बई । भारतमा कोरोना संक्रमणबाट थप एक जनाको मृत्यु भएको छ । कोरोना भाइरस संक्रमणबाट ६३ बर्षीया व्यक्तिको ज्यान गएको हो ।
यससँगै भारतमा कोरोना भाइरस संक्रमणबाट मृत्यु हुनेको संख्या पाँच पुगेको छ । यसअघि कोरोना भाइरस (कोभिड-१९) संक्रमणबाट चार जनाको मृत्यु भइसकेको छ ।
महाराष्ट्रको स्वास्थ्य विभागका अनुसार, कोरोना संक्रमित व्यक्तिको उपचारको क्रममा शनिबार राति मृत्यु भएको हो ।
उनमा कोरोना भाइरस पोजेटिभ देखिएको थियो । यसैबीच बिरामी पहिलेदेखि डायबिटिज, हाई ब्लड प्रेसर तथा मुटुको बिरामी थिए ।
राज्यमा कोरोना भाइरसको स्थिति गम्भीर हुँदै गइरहेको छ । २४ घण्टामा १० नयाँ संक्रमित देखिएका छन् । जसमा ६ जना मुम्बइका र ४ जना पुणेका छन् ।
महाराष्ट्रमा कोरोना संक्रमित व्यक्तिको संख्या ७४ पुगेको छ । उनीहरुको विभिन्न अस्पतालमा उपचार भइरहेको छ ।
