अफगानिस्तानका राष्ट्रपति अशरफ घानीले अमेरिका–तालिबानबीच सम्पन्न नयाँ सम्झौताअन्तर्गत हजारौं तालिबानी विद्रोही बन्दीहरुलाई रिहा गर्ने निर्णय अफगान सरकारलाई अस्वीकार्य रहेको बताएका छन् । शनिबार कतारको दोहामा अमेरिका र तालिबानबीच शान्तिवार्ता भएको थियो ।
वार्ताको एक साताअघि अफगानिस्तानमा 'आंशिक युद्दविराम' गर्न सबैपक्ष तयार भएका थिए । राष्ट्रपति घानीले 'आंशिक युद्दविराम' भने जारी नै रहने बताएका छन् ।
सम्झौतामा अमेरिकीसहित सबै विदेशी सेना १४ महिनाभित्र स्वदेश फर्किने उल्लेख छ । यसको बदलामा तालिवानले धेरै प्रतिवद्धता व्यक्त गरेको छ । उसले थप विस्तृत शान्ति सम्झौताका लागि अफगान सरकारसँग वार्ता गर्नेछ ।
“पूर्ण युद्धविरामको अवस्था सिर्जना गर्न हिंसामा कमी आउनु पर्नेछ,” काबुलमा आयोजित पत्रकार सम्मेलनमा राष्ट्रपति घानी भने । अफगानिस्तानमा तैनाथ विदेशी सेनाका संयोजक अमेरिकी कमाण्डरतर्फ संकेत गर्दै घानीले भने, “जनरल स्कट मिलरले तालिवानलाई यही गर्न सल्लाह दिनु भएको छ । \
यो अवस्थाले निरन्तरता पाउने अपेक्षा गरिएको छ,” शान्तिको मार्गमा गतिरोध ल्याउन सक्ने एउटा बुँदातर्फ अफगान सरकारको ध्यानाकर्षण भएको उनले बताए ।
सम्झौताको एउटा धारामा तालिबानले बन्धक बनाएका १ हजार सरकारी सैनिक र सरकारी कारागारमा थुनिएका करिब ५ हजार तालिबानी लडाकूलाई रिहा गरिने उल्लेख छ । “पाँच हजार तालिबानी बन्दीलाई रिहा गर्ने प्रतिबद्धतामा अहिल्यै सहमत हुन सकिन्न,” घानीले भने, “यो अफगानिस्तानका जनताको अधिकार र आत्मनिर्णय हो ।
यस विषयलाई अन्तर–अफगान वार्ताको समयमा एक एजेन्डा बनाउनु पर्ने थियो र वार्तामा यसलाई पूर्व शर्तका रुपमा लिन सकिन्न ।” उनले कुनै पनि बन्दी रिहाई गर्ने कुरा अमेरिकी अधिकारको विषय नभएको बताए । 'यो अफगान सरकारको अधिकार क्षेत्रभित्रको कुरा हो,” उनले भने ।
