धेरै युरोपेली देशहरुले अहिले कोरोना भाइरस देखिएको घोषणा गरेका छन्, भाइरस इटली हुँदै फैलिएको उनीहरुले बताएका छन् ।
अस्ट्रिया, क्रोयशिया र स्विचरल्यान्डका अनुसार इटली घुमेर आएका व्यक्तिमा कोरोनाको संक्रमण देखिएको हो । अल्जेरिया र अफ्रिकामा पनि यस्तै देखिएको थियो ।
ल्याटिन अमेरिकी देश ब्राजिलका एक नागरिक इटलीबाट फर्किएलगत्तै उनमा पनि कोरोनाको संक्रमण देखिएको थियो ।
इटलीमा कोरोनाको प्रभाव युरोपमै सबैभन्दा खराब देखिएको छ । यहाँ ३ सयभन्दा बढीमा कोरोना देखिएको छ भने ११ जनाले ज्यान गुमाइसकेका छन् । तर इटलीका छिमेकी देशहरुले अहिल्यै सीमा बन्द गर्नु जायज नहुने प्रतिक्रिया दिएका छन् ।
फ्रान्स, जर्मनी, इटली र इयु कमिसनका स्वास्थ्य मन्त्रीहरुबीचको मंगलबारको बैठकमा सीमा खुला राख्ने सहमति भएको छ । ‘हामी त्यस्तो भाइरसबारे कुरा गर्दैछौं, जसले सीमाको ख्याल गर्दैन,’ इटलियन स्वास्थ्य मन्त्री रोबर्टो स्पेरान्जाले भनेका छन् ।
सीमा बन्द गर्दैमा भाइरसको न्युनीकरण नहुने भएकाले लागि सीमा खुला नै राख्ने सहमति जुटेको हो ।
कहाँ–कहाँ देखियो ?
चीन, दक्षिण कोरिया, इरानलगायत एशियाली देशमा कोरोनाले महामारीको रुपमा लिइसकेको छ । स्विजरल्यान्ड,क्रोयशिया, स्पेन, जर्मनी, फ्रान्सलगायत युरोपेली देशमा पनि यसको संक्रमण फैलिसकेको छ ।
बुधबार प्रकाशित पछिल्लो आँकडाअनुसार कोरोनाको महामारी फैलिएयता विश्वभर ७८ हजार ६४ जनामा यसको संक्रमण देखिइसकेको छ ।
