रौतहट । किसानहरुलाई उखुको रकम नदिएका चिनी उद्योगका संचालकहरु विरुद्ध पक्राउ पूर्जी जारी भएपछि चिनी उद्योगले किसानको खातामा पैसा पठाउन सुरु गरेको छ ।
रौतहटस्थित श्रीराम चिनी उद्योगले शुक्रबार पाँ हजार ३०० जना किसानको खातामा रकम पठाएको छ ।
श्रीराम चिनी उद्योगका सन्चालक विशाल अग्रवालसहित तीन जनाविरुद्ध ठगी मुद्दामा पक्राउ आदेश जारी भएको थियो । त्यसपछि उद्योगले किसानको पैसा दिन थालेको हो ।
शुक्रबार श्रीराम चिनी उद्योगले १६ करोड ४४ लाख रुपैयाँ ५५ सय किसानको खातामा हालिदिएको जानकारी आएको प्रदेश २ का प्रहरी प्रमुख डिआइजी धिरज प्रताप सिंहले जानकारी दिए ।
किसानले आफूहरुको ४१ करोड बक्यौता बाँकी रहेको र उद्योगले ३५ करोड दिन मात्रै बाँकी रहेको बताइरहेको जनाउँदै डिआइजी सिंहले सम्पूर्ण हिसाब फर्छ्योट नभएसम्म आफूहरुले निगरानी गरिराख्ने बताए ।
राकेश अग्रवाल खोज्दै प्रहरी
अन्नपूर्ण चिनी उद्योगका संचालक राकेश अग्रवालविरुद्ध पनि पक्राउ पूर्जी जारी भएको छ । उनको खोजी भइरहेको प्रहरीले जनाएको छ ।
उखु किसानको १७ करोड रुपैयाँ राकेश अग्रवालले तिर्न बाँकी रहेको बताइएको छ ।
चिनी उद्योगहरुले उखुको पैसा नदिएपछि उखु किसानहरु केही दिनदेखि काठमाडौं आएर प्रदर्शन गरिरहेका छन् ।
