लकडाउनमा व्यापार व्यवसाय हुन नसक्दा भाडा समेत तिर्न नसक्ने भन्दै सिभिल मलका व्यवसायीले मल व्यवस्थापनलाई तालाचाबी बुझाउने भएका छन् ।
मल सञ्चालकले व्यवसायीलाई ५० प्रतिशत भाडा असार २५ गतेभित्र बुझाउन भनेको थियो । तर, सो भाडा तिर्न व्यवसायीहरु सक्षम नभएकाले आफूहरुसँग भएको सम्पत्ति (पसल) नै व्यवस्थापनलार्ई जिम्मा लगाउन लागिएको सिभिल मल व्यवसायी संघका अध्यक्ष रत्न घिमिरेले बताए ।
यद्यपि, सञ्चालकसँग भाडाको विषयमा सहमति गर्न अहिले पनि व्यवसायी छलफलमा छन् । यदि सो विषयमा सहमति नभएमा आजै १ बजे सबै व्यवसायीले सञ्चालकलाई तालाचाबी बुझाउने घिमिरेको भनाइ छ ।
घिमिरे भन्छन्, ‘अहिले घरमा के खाने भन्ने भएको बेला यति धेरै रकम बुझाउन सकेनौँ र हामीसँग भएको सम्पत्ति यही पसल हो त्यसकारण पसल नै जिम्मा लगाउन खोजेका हौँ । ’
मलमा एक लाखदेखि ८ लाखसम्म पसलका भाडा रहेको छ । मलमा १ सय ६० भन्दा बढी पसल छ । २५ गतेसम्म ५० प्रतिशत भाडा नबुझाए २५ प्रतिशत मात्र छुट दिने व्यवस्थापनले भनेको थियो ।
