उद्योग वाणिज्य तथा आपूर्ति मन्त्रालयले भारततर्फ चिया निकासीमा अवरोध नभएको दावी गरेको छ । सहज निकासीमा केही समस्या देखिए पनि चियामा प्रतिबन्ध नै भने नभएको उद्योग वाणिज्य तथा आपूर्ति राज्यमन्त्री मोतीलाल दुगडले बताए ।
‘पूर्ण निकासीमा केही समस्या देखिएको तर त्यो पनि समाधान उन्मुख छ, बाहिर अनर्गल हल्ला धेरै भयो,’ राज्यमन्त्री दुगडले भने । गत शनिबार मात्रै भारततर्फ चिया निकासी भएको अनुज्ञापत्रसमेत मन्त्रालयको नोटिसमा भएको उनको भनाइ थियो ।
‘शनिबार मात्रै चिया निकासी भएको देख्दादेख्दै कसरी प्रतिबन्ध लाग्यो भनियो ? अन्य विवादसँग जोडेर धमिलो पानीमा माछा मार्ने प्रयास भयो,’ राज्यमन्त्री दुगडले भने ।
शनिबार मात्रै एक कम्पनीले भारततर्फ नौ हजार १ सय ४७ किलो चिया निर्यात गरेको मन्त्रालयले जनाएको छ ।
यता भन्सार विभागले नेपाल र अन्य मुलुकसँगको व्यापार नियमित रहेको बताएको छ । परिक्षणका लागि चिया भारततर्फ लैजानुपर्ने भएकाले केही असहजता देखिए पनि अन्य सबै निकासी पैठारी नियमित रहेको भन्सार विभागका महानिर्देशक सुमन दाहालले जानकारी दिए ।
