राष्ट्रिय पुनःनिर्माण प्राधिकरणले असुरक्षित स्थानमा रहेका भूकम्पपीडित लाभग्राहीमध्ये चार हजार दुई सय चारलाई सुरक्षित आवासका लागि जग्गा व्यवस्था मिलाइएको बताएको छ ।
आठ हजार सात सय ४४ भूमिहीन तथा सुकुम्बासी लाभग्राहीलाई जग्गा खरिद र अन्य वैकल्पिक व्यवस्था गरी जग्गा उपलब्ध गराई निजी आवास पुनःनिर्माण गर्ने वातावरण मिलाइएको प्राधिकरणका सहप्रवक्ता मनोहर घिमिरेले बताए ।
भौगोलिकरूपमा पहिरो, बाढीलगायत जोखिममा रहेका भूकम्पपीडितलाई प्राधिकरणले पुनःनिर्माणका लागि जग्गा व्यवस्था गरेको हो ।
यसैगरी ४३ वटा एकीकृत बस्तीको योजना स्वीकृत भएको छ । हालसम्म नौवटा एकीकृत बस्तीको पुनःनिर्माण सम्पन्न भइसकेको छ ।
२७ वटा निर्माणाधीन छन् । विभिन्न जिल्लामा सात सय ६२ किमी सडक पुनर्निर्माण गर्नुपर्नेमा चार ४३ किमि काम सम्पन्न भएको छ । तीन सय १९ किमि सडकको पुनःनिर्माण अन्तिम चरणमा छ ।
पुनःनिर्माणका क्रममा हालसम्म सरकार र दातृ निकायबाट तीन खर्ब नौ अर्ब र गैरसरकारी संस्थामार्फत ७२ अर्ब गरी तीन खर्ब ८१ अर्ब खर्च भएको छ ।
कोभिड १९ अर्थात कोरोना भाइरसको महामारीबाट बच्न एक महिनादेखि लकडाउन जारी रहेकाले पुनःनिर्माणका काममा असर परेको प्राधिकरणले जनाएको छ ।
कोरोनाबाट स्थिति सहज हुनासाथ पूर्ववतरूपमा नै पुनःनिर्माणका काम हुने विश्वास पनि प्राधिकरणले लिएको छ ।
कोरोनाका कारण जारी बन्दाबन्दीले पुनःनिर्माण र पुनःस्थापनाका बाँकी काम सम्पन्न गर्न चुनौती भने थपिदिएको सहप्रवक्ता घिमिरेले बताए ।
