काठमाडौं । रौतहटको हनुमान मन्दिरका पुजारी श्रीराम साह तेलीको हत्याको विरोधमा काठमाडौंमा प्रदर्शन भएको छ । 

हत्यारा पत्ता लगाई कडा कारबाहीको माग गर्दै राष्ट्रिय प्रजातन्त्र पार्टी (राप्रपा) को विद्यार्थी संगठनले काठमाडौंमा विरोध प्रदर्शन गरेको हो ।

प्रदर्शनमा सहभागी केन्द्रीय अध्यक्ष महेश सिंह लगायत १२ विद्यार्थी नेतालाई प्रहरीले नियन्त्रणमा लिएको राप्रपा प्रचार विभाग प्रमुख मोहन श्रेष्ठले जानकारी दिएका छन् ।

राप्रपा अध्यक्ष कमल थापाले सो प्रदर्शनका लागि विद्यार्थी संगठनका नेताहरुलाई धन्यवाद ज्ञापन गरेका छन् ।

अध्यक्ष थापाले पुजारी हत्याको विरोध गर्दै हत्यारालाई कारवाहीको माग गरेका छन् । साथै उनले पक्राउ परेका बिद्यार्थीलाई तत्काल रिहा गर्न माग समेत गरेका छन् ।

सामाजिक सञ्जाल ट्विटरमा थापाले लेखेका छन्, ‘स्याबास ! निर्दोष पुजारी हत्याको विरोध तथा हत्यारालाई कारवाहीको माग गर्दै प्रतिकुल परिस्थितिका वावजुद राष्ट्रिय प्रजातान्त्रिक बिद्यार्थी संगठनले सांकेतिकरूपमा भएपनि प्रदर्शन गर्न सक्षम भएकोमा । पक्राउ परेका बिद्यार्थीहरूलाई तत्काल रिहा गरियोस्।’

स्याबास!
निर्दोष पुजारी हत्याको बिरोध तथा हत्यारालाई कारवाहीको माग गर्दै प्रतिकुल परिस्थितिका वावजुद राष्ट्रिय प्रजातान्त्रिक बिद्यार्थी संगठनले सांकेतिकरूपमा भएपनि प्रदर्शन गर्न सक्षम भएकोमा।
पक्राउ परेका बिद्यार्थीहरूलाई तत्काल रिहा गरियोस् https://t.co/kxnnDhsgcR

— Kamal Thapa (@KTnepal) August 28, 2020

गत भदौ ३ गते रौतहटको माधवनारायण नगरपालिका–२ खेसरहियास्थित हनुमान मन्दिरका पुजारी श्रीराम साह तेलीको हत्या भएको थियो । 

राति खाना खान बसेका बेला पुजारी श्रीराम साहलाई अज्ञात व्यक्तिले कन्चटमा गोली हानेर हत्या गरेको थियो ।