काठमाडौं । काठमाडौंको मनमैजुस्थित सुमन गोर्खा खाजा घरमा भएको छुरा प्रहार ‘पुरानो प्रेमिका’को बारेमा विवाद हुँदा भएको खुलासा भएको छ ।
नुवाकोट घर भएका लक्ष्मण तामाङको समूह त्यहाँ पुगेर चिया पिउँदा पिउँदै एकैछिनमा दुई पक्षबीच विवाद हुँदा दोर्जे समूहले छुराले हानेर २४ वर्षीय लक्ष्मणको हत्या गरेका हुन् ।
शुक्रबार साँझ भएको सो हत्या ‘युवती विवाद’का कारण भएको प्रहरीको प्रारम्भिक अनुसन्धानबाट थाहा भएको छ । मृतक र दोर्जे समूहको बिचमा ‘पुरानो प्रेमिका’को बारेमा विवाद भएको हत्याबारे अनुसन्धान गरिरहेका एक प्रहरी अधिकृतले जानकारी दिए । उनीहरुबिच अघिल्लो दिन पनि सामान्य विवाद भएको थियो ।
हत्यामा संलग्न मुख्य आरोपी पक्राउ परेका छैनन् । सोधपुछका लागि तीनजना युवलाई पक्राउ गरिएको महानगरीय प्रहरी परिसर काठमाडौंले जनाएको छ ।
दुईपक्ष झडप हुँदा दोर्जेले खाजाघरबाट लखेट्दै मितेरी पुलमा लगेर लक्ष्मणलाई छुरा हानेको बताइएको छ । हत्याबारे प्रहरीले अनुसन्धान गरिरहेको छ ।
