काठमाडौं । उपमेयर कप राष्ट्रिय महिला लिग छनोटमा (आज) सोमबार दुई खेल हुँदैछ । सातदोबाटोस्थित एन्फा मुख्यालयमा हुने पहिलो खेल दिउँसो १२ बजे समूह ‘आइ’ अन्तर्गत कैलालीको गौरीगंगा नगरपालिका र बराहक्षेत्र नगरपालिकाबीच प्रतिस्पर्धा हुनेछ ।
यसअघि वेदकोट नगरपालिकाले बराहक्षेत्रलाई पराजित र गौरीगंगासँग बराबरी खेलेको थियो । वेदकोट दुई खेलमा चार अंकसहित समूहको शीर्ष स्थानमा छ ।
अन्तिम खेल समूह ुजेु अन्तर्गत धरान उपमहानगरपालिका र उदयपुरको चौदण्डीगढी नगरपालिकाबीच हुनेछ । खेल दिउँसो ३ बजे हुनेछ ।
यसै समूहको पहिलो खेलमा सिन्धुपाल्चोकको सुनकोशी गाउँपालिकाले धरान र दोस्रो खेलमा चौदण्डीगढीलाई हराउँदै दुई खेलमा शतप्रतिशत नतिजा निकालेको छ । यी दुई टोलीले समूह चरणको अन्तिम खेल खेल्न लागेका हुन् ।
प्रतियोगितामा सहभागी ३१ टोलीलाई १० समूहमा बाँडिएको छ । प्रत्येक समूहको विजेता नकआउट चरणमा पुग्नेछन् ।
हालसम्म समूह ‘ए’ बाट झापाको कन्काइ नगरपालिका, समूह ‘बी’ बाट ललितपुर महानगरपालिका, समूह ‘सी’ बाट बर्दियाको बाँसगढी नगरपालिकाले नकआउट चरणमा स्थान बनाइसकेका छन् ।
समूह ‘डी’ बाट झापाको शिवसताक्षी नगरपालिका, समूह ‘ई’ अन्तर्गत इलामको रोङ गाउँपालिका, समूह ‘एफ’ बाट दाङको तुलसीपुर नगरपालिका नकआउट चरणमा पुगेका छन् ।
