काठमाडौं । आइसिसी विश्व कप क्रिकेट लिग–२ अन्तर्गतको त्रिदेशीय एकदिवसीय क्रिकेट श्रृंखलामा नेपालले अमेरिकालाई १७५ रनकाे लक्ष्य दिएकाे छ ।
अल अमिरात क्रिकेट मैदानमा टस हारेर पहिले ब्याटिङ गरेकाे नेपालले ४८ ओभरमा अलआउट हुँदै १७४ रन बनायाे ।
नेपालका लागि कप्तान ज्ञानेन्द्र मल्लले अर्धशतक बनाए । ज्ञानेन्द्र मल्ल १०५ बलमा ५५ रन बनाएर आउट भए । त्यस्तै कुशल भुर्तेलले ३६ र राष्ट्रिय टाेलीमा डेब्यु गरेका गुलशन झाले २८ रन बनाए ।
बलिङतर्फ अमेरिकाका साैरभ नेत्रवाल्करले चार विकेट लिए । त्यस्तै किले फिलिपले तीन विकेट लिए ।
लिग–२ मा ओमान १२ खेलमा २० अङ्क जोडेर शीर्ष स्थानमा छ । अमेरिका १४ खेलमा १२ अङ्क जोडेर दोस्रो स्थानमा छ भने नेपाल ६ खेलमा ६ अंक जोडेर छैटौँ स्थानमा छ ।
सात टोली रहेको लिग–२ मा एक टोलीले नाै श्रृंखलासहित कुल ३६ खेल खेल्ने छन् । लिग–२ मा शीर्ष हुने तीन देशले सन् २०२३ को जुलाईमा जिम्बावेमा हुने विश्व कप छनोटमा स्थान बनाउने छन् ।
ज्ञानेन्द्रको कीर्तिमान
यसैबीच, राष्ट्रिय क्रिकेट टोलीका कप्तान ज्ञानेन्द्र मल्ल नेपालका लागि एकदिवसीय क्रिकेटमा सर्वाधिक रन बनाउने खेलाडी बनेका छन् ।
आइसिसी विश्व कप क्रिकेट लिग–२ अन्तर्गत आज शुक्रवार अमेरिकासँगको खेलमा ५५ रन बनाएका कप्तान मल्लले कीर्तिमान बनाएका छन् । आजको रनसँगै ज्ञानेन्द्रले एकदिवसीयमा तीन सय ६६ रन बनाएका छन् ।
यसअघि पूर्वकप्तान पारस खड्का तीन सय १५ रनसहित नेपालका लागि एकदिवसीय क्रिकेटमा सर्वाधिक रन बनाउने खेलाडी थिए ।
