काठमाडौं । कतार फिफा विश्वकप छनोट अन्तर्गत युरोपेली छनोट खेलमा स्ट्राइकर मेम्फिस डिपाए र यर्लिङ हालाण्डको ह्याट्रिकमा नेदरल्यान्ड र नर्वेले सहज जित निकालेका छन् ।
मंगलबार राति भएको समूह ‘जि’ को छुट्टाछुट्टै खेलमा घरेलु मैदानमा नेदरल्यान्डले टर्कीलाई ६–० गोल अन्तरले पराजित गरेको हो ।
एक पक्षीय खेलमा नेदरल्यान्डलाई जित दिलाउन बार्सिलोनाका स्ट्राइकर डिपाएले खेलको १६, ३८ र ५४औँ मिनेटमा गोल गर्दै ह्याट्रिक पूरा गरे । डिपाएले एक पेनाल्टी गोल गरेका थिए ।
यस्तै, नेदरल्यान्डका लागि डाभि क्लासिन, गुस टिल र डनयेल मलेनले एक–एक गोल गरे । समूह ‘जि’ कै अर्को खेलमा यर्लिङ हालान्ड प्रेरित नर्वेले गिब्रार्टारलाई ५–१ गोल अन्तरले पराजित गरेको छ ।
घरेलु मैदानमा नर्वेलाई जित दिलाउन स्ट्राइकर हालाण्डले ह्याट्रिक पूरा गरे । उच्च लयमा रहेका हालान्डले खेलको २७, ३९ र ९०औँ मिनेटमा गोल गर्दै ह्याट्रिक पूरा गरेका हुन् । क्रिष्टियन थोरोस्भेत र एलेक्जाण्डर सोरलोथले १–१ गोल गरेका थिए ।
जितसँग समूह ‘जि’ मा नेदरल्यान्ड र नर्वेको समान ६ खेलबाट १३ अंक छ । गोल अन्तरका आधारमा नेदरल्यान्ड शीर्ष स्थानमा छ । समान ६ खेलबाट ११ अंक बनाएको टर्की तेस्रो स्थानमा छ ।
