अखिल नेपाल फुटबल संघ एन्फाको कार्यकारी समितिको आपतकालीन बैठक बस्दैछ । सातदोबाटोस्थित एन्फा मुख्यालयमा शुक्रबार दिउँसो ४ बजे समितिको बैठक बोलाइएको हो ।

बैठकमा प्रशिक्षक अब्दुल्लाह अलमुताइरीको प्रकरणको सन्दर्भमा र दोस्रो साफ फुटबल आयोजनाको सन्दर्भमा छलफल रहने छ । आधिकारिक राजीनामा नदिए पनि अलमुताइरी सामाजिक सञ्जालमार्फत गरेको राजीनामालाई बढी चासोका रुपमा हेरिएको छ ।

साउन १० गते अमुताइरीले वरिष्ठ उपाध्यक्ष पंकजविक्रम नेम्वाङले केही सातायता आफूलाई दुःख दिएको कारण राजीनामा दिने बताएपछि सामाजिक सञ्जाल तरंगित बनेको थियो ।

त्यस्तै, नेम्वाङले आफूमाथिको आरोप पुष्टि गर्न चुनौती दिँदै छानविनको माग गरेका थिए । नेम्बाङले आरोप लागेसँगै छानविनको माग गर्दै निवेदन दिएका थिए । अमुताइरीले पनि बिहीवार दुई सञ्चारकर्मी र वरिष्ठ उपाध्यक्षसँगको विवाद सम्बन्धमा छानविन गर्न भन्दै एन्फामा निवेदन दिएका थिए ।