चार वर्षको प्रतिबन्धपछि २०७६ सालको असोज ११ गते नेपाल क्रिकेट संघमा नयाँ कार्यसमिति चयन भयो । त्यसको केही महिनामा अन्तर्राष्ट्रिय क्रिकेट काउन्सिल आईसीसीले क्यानलाई शसर्त फुकुवा गरेको थियो । आईसीसीले क्यानलाई आर्थिक पारदर्शीता, सुशासन, कार्यालय व्यवस्थापन लगायतका कुरालाई मुख्य सर्तमा राखेको थियो । यसका साथै आईसीसीले क्यानले पठाएको योजना अनुसार बजेट पठाउने गरेको छ । 

आइसीसीको सर्तलाई कार्यान्वयन गर्नका लागि क्यानले सक्दो प्रयास पनि गर्दै आएको छ । तर, जुन तरिकाले क्यानले आईसीसीको पालना गर्नुपर्ने हो, त्यसमा भने कहिकतै चुकेको जस्तो पनि देखिन्छ । क्यानले अहिलेसम्म अफिस व्यवस्थापन गर्न सकेको छैन । पदाधिकारी नियुक्तिको काम पुरा गरे पनि समयमा नै आफ्नो अडिट रिपोर्ट बुझाउन सकेको थिएन । 

यो बीचमा नेपाल क्रिकेट संघले घरेलु भूमीमा एकदिवसीय र टी–२० अन्तर्राष्ट्रिय सिरिज पनि गरेको थियो भने घरेलु क्रिकेट सुरु भइसकेका छन् । तर उमेर समुहको क्रिकेट गर्ने योजना क्यानले बनाए पनि कोभिड–१९ का कारण सुरु हुन सकेको छैन । 

यो बीचमा क्यानका पदाधिकारीका सानातिना कुराले किचलो नभएको पनि  होइन । कार्यालय मर्मतका लागि बजेट निकासा गर्दा पदाधिकारीहरू बीचमा किचलो भएका कुराहरू पनि आएका थिए । आईसीसीले राखेका सबै सर्तहरू पालना गरेको बताइरहे पनि क्यानको निलम्बन पुर्णरुपमा फुकवा हुन्छ या हुँदैन त्यौ अझै अनुत्तरित प्रश्नको रुपमा रहेको छ ।

यस्तैमा आइसीसीको आइतबार बैठक बस्दै छ । आइसीसीको बैठक बस्दै गर्दा नेपालको पूर्णरुपमा निलम्बनको एजेन्डा प्राथमिकतामा पर्छ की पर्दैन त्यो पनि प्रतिक्षाको विषय नै छ ।

नेपाल क्रिकेट संघका पदाधिकारीहरुले जुलाईको यो बैठकबाट क्यानको निलम्बन फुकुवा हुने आशा व्यक्त गर्दै सुरुवाती दिनमा बताउँदै आएका थिए । तर, उनीहरूको आशा अहिले निराशामा परिणत हुन थालेको आभास पनि भएको छ ।

क्यानले सबै सर्तहरू पुरा गरेको बताए पनि आईसीसीको निर्देशनमा गर्नुपर्ने केही कामहरू समयमा नै गर्न सकेन । संघमा कर्मचारी चयनको काम गरे पनि काम कर्तव्य बाँडफाँडमा ढिलाई गरेको थियो । कर्मचारीको टिओआर तथा आर्थिक नियमावली पारित गर्न ढिलाई गर्नुका साथै आईसीसीमा समयमै पठाउन सकेन । 

त्यसमा पनि कोभिडका कारण आइसीसीले पनि विभिन्न एजेन्डालाई समाधान गर्नुपर्ने हुँदा नेपालको निलम्बन फुकुवाको एजेन्डा यसपटकको बैठकमा नपर्ने प्रबल सम्भावना रहेको छ । जसका कारण नेपाली क्रिकेट पुर्ण रुपमा फुकुवा हुने संभावना पनि अहिलेका लागि पछि सर्ने देखिएको छ । 

अझै पनि क्यानको कामहरू आईसीसीको नियन्त्रणमा रहेर नै गर्नुपर्ने हुन्छ । आइतबार बस्ने आईसीसीको बैठकले नेपालको निलम्बनमा कुनै निर्णय नगरेको खण्डमा फेरि यो एजेन्डालाई आइसीसीले कहिले बोर्डमा राख्न भन्ने त्यो पनि एकिन छैन । 

क्यान निलम्बन हुँदा नेपाली क्रिकेटको धरातललाई राम्रोसँग बुझेको आईसीसीले नयाँ कार्यसमिति आएपछि पनि केही समय यसको कामलाई निगरानीमा राखेको थियो । अहिले पनि नेपाली क्रिकेटमा हुने गरेका केही सानातिना गल्तिको जानकारी विभिन्न व्यक्तिले आईसीसीमा पुर्‍याउने  गरेको बताइन्छ । जसका कारण पनि अहिलेको कार्यसमितिप्रति आईसीसी अझै पनि पुर्ण रुपमा विश्वस्त हुन नसकेको हो की भन्ने प्रश्न पनि यथावत छ । 

अहिले क्यानले आईसीसीबाट नियन्त्रित ‘फण्ड’ (पैसा) लिइरहेको छ । क्यानले आफ्नो योजनाहरू पठाउने र त्यसका लागि मात्र आईसीसीले रकम पठाउने गरेको छ । त्यसमा अहिले आईसीसीले मुख्य गरेर खेलाडीको तलब, कर्मचारी, ग्राउण्ड स्टाफको तलब र प्रतियोगिता हुँदा क्यानले पठाएको योजना अनुसारको बजेट मात्र ‘रिलिज’ गरेको छ । 

यो पटकको क्यान निलम्बन फुकुवाको पर्खाई क्यानका लागि असफल भएको खण्डमा त्यसको मारमा फेरि पनि नेपाली क्रिकेट पक्कै पर्नेछ । यता क्यानले आन्तरिक रुपमा विभिन्न काम गरिरहेको भए पनि त्यसलाई नतिजाउन्मुख बनाउन प्रयासरत रहेको छ ।