युरोकप २०२० को फाइनलमा इङ्ल्याण्डले पहिलो गोल गरेको छ । खेलको दोस्रो मिनेटमै इङ्ल्याण्डले इटलीविरुद्ध गोल गरेको हो ।
बेम्बली रंगशालामा जारी खेलमा इङ्ल्याण्डका लुक शाले गोल गरेका हुन् । ट्रिपरको पासमा शाले घरेलु टोलीलाई अग्रता दिलाएका हुन् ।
जारी खेलको पहिलो हाफ सकिदा इंग्ल्यान्डले १-० गोलको अग्रता बनाएको छ । पहिलो हाफमा बलमा पकड जमाए पनि इटालीले गोल फर्काउन सकेन ।
इटली तीन पटकको च्याम्पियन स्पेनलाई हराउँदै उपाधि नजिक पुगेको हो । पहिलो सेमिफाइनलमा इटलीले स्पेनलाई पेनाल्टी सुटआउटमा ४-२ गोल अन्तरले पराजित गरेको थियो ।
इङ्ल्याण्डले डेनमार्कलाई पराजित गर्दै इटलीसँगको भेट पक्का गरेको हो । रोमान्चक खेलमा इङ्ल्याण्डले डेनमार्कलाई अतिरिक्त समयमा २-१ गोल अन्तरले पराजित गरेको थियो ।
आजको खेल जित्दै इङ्ल्याण्ड इतिहास रच्ने दाउमा छ । इङ्ल्याण्ड ५५ वर्षपछि ठूलो प्रतियोगिताको फाइनलमा पुगेको हो । इङ्ल्याण्डले यसअघि सन् १९६६ मा विश्वकपको उपाधि जितेको थियो ।
यसैबीच, चारपटकको विश्वविजेता तथा १९६८ को युरो विजेता इटली यो पटक पनि उपाधि उचाल्ने लक्ष्यमा छ ।
