मच्छिन्द्र क्लबका सहायक प्रशिक्षकका रूपमा काम गरिसकेका निशान श्रेष्ठ भारतीय क्लब मिनेर्बा पन्जाबमा अनुबन्ध भएका छन् ।
उनीसँगै फिजियो अनीश बुढाथोकी पनि सोही क्लबमा आबद्ध भएका छन् ।
श्रेष्ठ टिमको सहायक प्रशिक्षक र अनीश फिजियोका रूपमा टिममा अनुबन्ध भएका छन् । उनीहरूको क्लबसँग आधिकारिक हस्ताक्षर हुनमात्र बाँकी रहेको बताइएको छ ।
दुवै जना क्लबको जिम्मेवारी सम्हाल्नका लागि पन्जाब पुगिसकेका छन् । श्रेष्ठ यसअघि नेपालमा पहिलोपटक भएको नेपाल सुपर लिगमा विराटनगर सिटी एफसीको सहायक प्रशिक्षकका रूपमा काम गरेका थिए । यस्तै बुढाथोकी पनि सोही टिमको फिजियो रहेका थिए ।
भारतीय क्लबमा नयाँ जिम्मेवारी पाएका उनीहरूले राम्रो अवसरका रूपमा लिएका छन् । उनीहरूको सम्झौताको अवधि भने हस्ताक्षरपछि मात्र सार्वजनिक गरिने बताइएको छ ।
